小三當道，不過小三亦唔一定係人，只要令一段關係分心，無論係PS4、打波定工作，都可以係他和她之間嘅第3者；而最難斬纜嘅，相信係是他也是你和我最密不可分嘅智能手機。最近球王馬勒當拿（左）就被爆因為呢個危害感情嘅「小三」，郁手打前女友！
馬勒當拿懷疑拳打前女友奧莉花（右）嘅影片喺網上流傳，片段所見球王原本「癱」喺梳化度睇電視，之後起身走近身後嘅奧莉花，突然發爛渣質問：「你仲玩緊手機？」奧莉花即刻反問一句「唔睇得咩？」，之後老馬有火疑似揮拳打人（小圖），奧莉花即刻叫佢停手。
雖然老馬喺86世盃以「上帝之手」帶領阿根廷痛擊英格蘭，最後亦贏得該屆世盃，地位舉足輕重，但呢段短短30秒嘅片段就將球王「一世英明」毀於一旦。出名脾氣暴躁嘅老馬事後堅稱只係搶手機，發誓冇動手打過女人乜乜乜。接受訪問之時，呢位53歲阿公級球王正喺杜拜窩居，好聽啲就叫兩袖清風冇女人煩；難聽啲講，一代球王都只係個獨居老人。
呂晨
以女性角度看球星新聞，唔用眉筆用原子筆寫低球壇百態！