自由黨田北俊俾北京搣柴冇得做政協，噚日成為傳媒追訪目標，但田少喺朝早未表決佢哋搣柴議決前，刻意避開傳媒暫時封嘴；咁記者搵唔到大少，自然走去搵佢細佬田北辰問點睇件事，但係八方諗唔到，二少除咗可以「代替」大少做訪問，原來仲可以「代替」大佬被搣柴！話說內地《人民網》噚日下午報道，政協常委通過大少被摵柴決定，但張相就用咗二少（圖）！雖然話大少、二少係兩兄弟，以前亦發生過認錯人事件，但《人民網》假假哋都係官媒，而且大少係政協、二少係港區人大代表，冇理由連資料相都搞錯！《人民網》知衰後刪咗二少張相，但冇換返大少嗰張喎！有網民笑說呢鋪係兄債弟還。