香港學生嘅佔領運動，一撻即着，年輕人勇於上街，葉劉淑儀猛講有人在背後組織，建制派透過WhatsApp大力散佈種種外國影響論，普選無國際標準論，美國策動顏色革命論，美國總統選舉係小圈子選舉論，全港滿天飛，大學生與年輕人用嘅（據CNN報導）就係FireChat，一個不受網絡權限嘅短訊「廣播」App，又利用fb以至Twitter，將訊息如大火燎原咁極速傳開晒。如果講外國美國勢力干預香港，WhatsApp、FireChat、Facebook、Twitter統統係美國人開發出來害香港人嘅，令到全世界革命分子、恐怖分子可以最低成本達到最大宣傳效果嘅。
使用上述通訊軟件，只需手持一個智能電話，又係美國人衰，推出iPhone與Android，顛覆全世界，玩殘咗諾基亞手機。美國影響力，無處不在。中國人無法驅散之，點好呀？好彩，如赫魯曉夫講過，資本家為咗賺錢，願意賣出一條麻繩嚟吊死資本主義，為咗賺錢，資本家乜都肯制。fb創辦人明知中國封殺fb，朱克伯格還是到北京求見大官，到清華大學用普通話演講，蘋果CEO庫克為咗iPhone市場，亦到北京大講蘋果會在中國「瘋狂投資」，音樂高手Kenny G俾中國外交部發言人一鬧，立即認低威，指自己在金鐘與佔中人士拍照係被利用，「新華網」又出評論文章批評杜汶澤、何韻詩、黃秋生等。
中國政府立場好明顯：任何人要在中國做生意，靠中國市場賺錢，就要聽中國的話，按中國政府意願說話，否則就逼你退出中國市場。唔係講笑㗎，香港已經有人好似好委屈咁在佔領運動開始前，退出佔領運動，自動宣佈執笠嘅啦，因為佢地有生意在內地吖嘛。王維基在中大就讀聯合書院，前星期聯合慶祝58周年院慶，請佢回校作演講嘉賓，王維基對聯合學生講：「我和你們的分別是，我有顧慮，若參加非法集會被捕，留下刑事案底，我就不能擔任上市公司的董事會主席，在法律上不再是『適當人選』去擁有任何電視或電訊牌照……我害怕、我慚愧，我發現我的行為，並非依從我多年受教育所學到的處事原則……我實不敢去做一些我認為是對的事情……當你走出校園，現實的社會只會叫你忘記對錯，社會會以13億人的市場力量叫你屈服……」（見晴報維基解碼，10月20日）。王維基感慨之言，學生能了解、諒解嗎？