雖然同屬蘋果出品，但單論炒風iPad Air 2就明顯唔及iPhone 6鬥，先達更係頭一日放機價已經要即蝕$180，可以話係零炒風。不過冇得炒唔代表冇人買，iPad一向都是用家多過炒家，前日記者就去過中環Apple Shop問過，iPad Air 2全線金色都冇貨，只有16GB WiFi可以即買，其他都勁少貨，想Walk in買都唔係咁易。
而記者就剛有一部iPad Air 2金色到手，老實講，雖然是輕薄了，但加上保護套後，其實感覺同記者一向用開的iPad Air分別真係唔大。但不能不說係佢個金色底做得相當靚，而Touch ID的金色小圈亦為大大塊的iPad帶來很好的點綴。
另一項特別感受到的，就是新的iPad Air 2聲音明顯力量較強，加上可能因為機身薄了，在高音量之下，機身震動比上代強烈得多，打機甚至有如用震動手掣的感覺。另外iPad Air 2亦設有慢動作拍攝，跟iPhone 6一樣，iPad Air就即使update了最新iOS 8.1都沒有此功能。
有新iPad Air 2玩，當然要拿它和舊的iPad Air比一比，先說畫面，新iPad Air 2的屏幕的結構有所不同，把原來的三層，結合成一層，據官方介紹除了可把機身造得更薄，在相同解像度的畫面亦有更好的表現，觸控感亦會更好。比較之下，觸控感分別暫時就真係感受不大，但畫面光度就比上代強一點，立體感亦有輕微進步，但實際觀感分別不算大。
運作效能上則有大分別，先試玩Gameloft的《狂野飆車8》，兩機同時開Game，iPad Air 2明題load得比iPad Air快，而進行遊戲中iPad Air 2表現極流暢，畫面亮麗；而iPad Air雖亦算流暢，但某些撞車位則有輕微窒格。再以iMovie剪片，則更可看出兩機效能分野，剪片過程雖同樣順暢，但當同時output處理一條約48秒，有畫中畫及分割畫面特效，又加了背景音樂的試片，iPad Air 2處理時間比iPad Air快近12秒，相信在處理更長更複雜的影片時，分野將更大，看來A8X處理器真的不是浪得虛名！
記者：韓繼聰
潘紹聰X柳俊江
星期一至五 晚晚「搵鬼睇」
http://hk.apple.nextmedia.com/horror