雨傘運動跟財爺曾俊華去到法國巴黎。財爺噚日參與貿發局喺巴黎舉行嘅「邁向亞洲，首選香港」活動，會場外有喺法國讀書嘅香港留學生示威，場內亦有人舉起雨傘，要求爭取真普選兼捍衞新聞自由。不過，財爺被人掟中雞蛋都可以幽默回應，見人舉傘當然係冇反應喇。
華華身處法國，同今次示威主辦單位嘅發言人Joanna傾咗幾句，佢話今次總共有七名學生到場示威，事前已經向法國警方提出申請，當局都派出6名法國警察到現場維持秩序。佢大讚法國警方非常通融，提到上次喺10月1日嘅示威活動，警方批出特快集會申請許可，令200至300人成功參加示威，佢認為本港警察要向法國警察學習，講講人情味。
雖然財爺喺現場冇乜反應，但星期日應該會喺自己個blog講番呢單嘢，佢都已經講咗好多個禮拜。