前天氣女郎樣靚身材正嘅Icy黃婉曼，周日（11月2日）正式畀人私有化，嫁畀會計師兼馬主馮柏基，將會喺尖沙咀洲際酒店設宴，以後大家可以叫佢做馮太。
Icy 曾經講過想生三個，家陣佢都30歲，要完成生三個嘅任務，需時六、七年閒閒哋，唔怪得咁心急嫁人啦。而喺婚禮之前，Icy同老公仔或者要先行一次拉頭馬之禮，基基隻愛駒「薑餅人」，將會喺周三晚出賽，隻馬今個月試過兩次大閘，一次谷草閘跑第三，走勢好輕鬆渾身是力；另一次泥地閘更勁，前快後快力壓惡馬「海鑽石」取勝，狀態肯定操到FIT晒，校啱時間響Icy結婚前上陣，明顯係練馬師刻意安排，希望勝出作為賀禮。
其實基基剛周日已有隻團體馬「點解」上陣，跑第三表現都唔錯，原來Icy好朋友梁芷珊，亦係「點解」馬主之一。梁芷珊話丈夫羅傑承同馮柏基老竇好熟，基基叫羅傑承做Uncle，梁芷珊笑言一直禁止基基叫自己做Aunt，費事搞到自己老晒。梁芷珊又話佢哋兩個郎才女貌，大讚基基好乖好靜，但識咗Icy後學識同一大班女人相處，祝福佢哋白頭到老㖭！