建制派陣營呢排好忙碌，事關一班京官不時坐鎮深圳，直接召人北上放話收風。噚日又有百幾二百名人大、政協同各界人士齊齊北上，聽全國人大常委會法工委副主任張榮順講話，中聯辦副主任楊健都係座上客。據聞張榮順演說重點都係話，香港嘅佔領運動已經變成顏色革命，有外國勢力喺度搞搞震。新意就真係冇乜，唔少人去到當係溫故知新。反而席間一大驚喜卻係，張榮順竟然仲識用佔中嚟講吓笑。話說佢提到香港佔領運動時，大讚事件凸顯香港道路網認真唔錯，事關佔領一個月以來，此路不通後、卻有另外一啲路可以行，交通擠塞冇預期咁嚴重，暢順度較北京仲好云云！