獎項呢家嘢，基斯坦奴朗拿度（C朗）唔知攞咗幾多個，不過佢上周六先喺西班牙國家打吡入波兼勁破紀錄，周一又喺西甲頒獎禮獨攬3獎，仲要入選埋金球獎23人名單爭取衞冕，幾日內威到咁，真係要畀啲掌聲有請。
雖然皇馬上季西甲唔夠馬體會砌，但計個人獎項就攞番晒彩，沙治奧拉莫斯同莫迪歷榮膺最佳後衞同中場，加埋上季踢利雲特嘅基羅拿華斯做最佳門將，不過最威嘅始終係C朗。有身穿一襲火紅長裙嘅女友艾琳娜相伴出席，C朗獨攬3獎，包括最佳球員、最佳前鋒同埋藉今年5月對華倫西亞嘅金球攞埋最佳入球。
上屆賽會無啦啦開多個最有價值球員嘅豬肉獎頒畀C朗，今屆「正名」贏番最佳球員兼打破美斯5屆壟斷，C朗梗係風騷，「我要多謝我嘅隊友、球會同屋企人，呢個係我職業生涯中一個美好時刻。團體獎項當然重要，但我都鍾意攞個人獎項㗎。」至於馬體會主帥施蒙尼攞最佳教練當然實至名歸，巴塞就靠恩尼斯達贏得最佳進攻中場，叫做破吓蛋喇。
拜仁皇馬金球獎大戶
至於國際足協噚日亦公佈咗世界金球獎23人名單（見附表），以國籍計梗係世盃冠軍德國最威，佔咗6席；球會方面拜仁同皇馬就各有6人入圍。葡萄牙喺世盃分組賽出局，C朗當然要扣分，但上次世盃年兼改制後首屆金球獎，明明恩尼斯達同沙維幫西班牙捧走世界盃，都要輸畀美斯；今次就算要同一眾德國兵以及帶領阿根廷攞世盃亞軍嘅美斯拗手瓜，有歐聯冠軍揸手嘅C朗，要衞冕真係不是夢。金球獎12月1號會公佈最後3強，出年1月12號就會喺瑞士蘇黎世頒獎。
識睇，一定係睇足英台【英波Live】：
http://soccer.appledaily.com
http://bit.ly/engballlive