旅發局「閃躍維港」3D光雕匯演今晚會喺尖沙嘴文化中心同鐘樓外牆開演，但八方日前就先睹為快，睇到30秒嘅試演，好似睇戲啲宣傳片咁，係15分鐘全版嘅精華。
喺前晚10點，當時文化中心一帶冇乜途人，不過當燈光亮起，一幕幕香港昔日蒸汽火車、舊火車站、I Love HK字句等投射喺巨型外牆，吸引唔少人駐足。
獲政府撥款約2,500萬元製作嘅「閃躍維港」3D光雕匯演第一輪匯演，會由今日至11月16日舉行，每晚8點半、9點、9點半同10點開騷，每節約15分鐘。隨後兩輪分別喺12月17至29日、明年2月14日至3月5日舉行。