陳裕光自2012年退下火線，轉任大家樂（341）非執行主席後，反而越活越後生，外表唔似62歲不突止，佢嘅活動仲要貼近年輕人。噚日佢出席一個公開活動時就自爆，平時鍾意行「年輕啲」嘅商場，要緊貼潮流咁話。
都說男人keep得好，冇成頭白髮、衰老狀況嘅話，可以越老越有型，陳裕光肯定係其中之一，估唔到嘅係，佢除咗keep住外表，平日活動都要年輕化。佢話，平時鍾意行年輕啲嘅商場，方便了解年輕人嘅諗法、潮流等等。
要講年輕人鍾意行嘅商場，來來去去咪又係觀塘apm或者旺角朗豪坊，不過，陳裕光噚日笑笑口話，佢上周末行嘅，唔係呢兩個商場，暗示係喺屯門開張大約一年嘅V city，聞說呢個商場都多20、30歲嘅客仔，難怪吸引到陳裕光到此一遊。