隔牆有耳：
潮跟王子着刻名皮鞋 - 李八方

英國哈里王子（Prince Harry）早前跪地同患病兒童玩，不經意露底……係鞋底，俾人見到鞋底刻住嘅金色英文字母「H」，盡顯貴氣。最經典則要數東亞銀行主席李國寶，2002年佢同廖碧欣同遊花都，就喺廖酒店房門外留低刻有佢英文名嘅皮鞋。
查實Blue Blood嘅皮鞋多數喺超級名牌度身訂做，但最近西班牙百年皮鞋老店LOTTUSSE進駐香港，就提供呢種服務。LOTTUSSE亞洲區域董事四角有志話，該店會先為客人量度腳掌大細，客人之後可以揀皮鞋顏色，有12種顏色揀，每隻最多可以混合三種色，連鞋底都有三種色揀，啱晒好色顧客。

全人手製作 5,000蚊起

重頭戲係可以喺鞋底刻字，兩隻鞋一樣或唔同都得，除咗人名仲可以刻I Love You等，但只可以刻英文字，因為每對鞋由裁剪皮面、縫製鞋底、染色到刻字，都由西班牙鞋廠全人手製造，每對5,000蚊起。
LOTTUSSE家族Fluxa已傳至第四代，第三代仲分支出嚟創辦Camper，粉絲包括西班牙皇室、德斯汀荷夫曼、羅拔迪尼路，連每日長時間站崗嘅英國皇家衞隊嘅鞋都由佢哋製造㗎。