剛周日第三場華將賴維銘策「鑽飾天使」出閘墮馬後被拖行一段路程，因而受傷送院，雖然當時無明顯受傷並可出院，但其後左肩疼痛及腫脹，今個星期三晚跑馬地賽事唔可上陣。
估唔到墮馬呢啲嘢，衰開有條路，呢日(28日)又有兩宗墮馬意外發生；第一單係蘇保羅馬房嘅未命名兩歲英國自購新馬T154，喺踱步期間拋下助手，不過隻馬好快被捉番，騎者亦無大礙，屬於小事一樁。
另一單就大鑊啲，徐雨石馬房嘅「夢醒八分」，喺機坪突然大發老脾，同樣摔跌助手，隻馬自己識路走返馬房，畀正喺馬房閘口嘅胡森截住冇乜事，但鞍上人就慘咯，倒在地上，面露痛苦之色，右腳明顯受傷，當時徐雨石唔知喺邊，但胡森同蘇偉賢兩個光頭練馬師就好好心，一人一邊半扶半抬將該騎馬人移到一旁，過咗一陣救護車嚟到，將佢送院檢查及治理。「夢醒八分」係3歲澳洲自購新馬，未曾上陣，今個月7日曾由潘頓試大閘，全程冇乜表現，走勢仍幾生硬吓，估唔到試閘後冇耐就發生意外。