冠軍騎師潘頓啱啱嗰次賽事贏五W，追到現時只落後雷神一W，情況好似啱啱西班牙國家打吡大戰，皇馬贏巴塞，追到落後巴塞一分，嘩！好睇囉！
潘頓嗰日咁犀利，除咗騎功好同運氣好之外，當日佢亦識得揀馬跑，贏「靚猴王」嗰場，佢唔揀「金鹿」，果然係明智之選。同樣情況出現喺今期賽事，好多場佢都有馬揀，而且所揀嘅馬排檔都好過棄騎，如第七場佢唔揀「愛的呼喚」同「幾叻仔」，而走去騎「大寶藏」，排位後「大寶藏」抽二檔，檔位好過兩匹棄騎，已經着數咗，唔通潘頓有未卜先知能力，先至有咁嘅選擇？
第二場佢唔吼「蜜圈」而騎隻初出馬「騏名燈」，咁啱「蜜圈」抽12檔，「騏名燈」排六位，你唔好理，又係運都贏埋。
睇睇吓，同樣情況於第五場出現，佢唔騎嗰隻「新活力」排十位，揀嗰隻「海嵐一號」排四位，有冇咁邪呀！