回顧番2010年11月美國QE2到而家，恒生指數足足迷失四年，晉佳發現當中走勢有一定規律。恒指大概每四至六星期左右，會出現一次轉向，機率唔低，尤其近年經常出現。以最近為例，恒指9月3日見頂，跌到10月3日見短期底部，大約四星期。10月3日至今，又出現接近四個星期嘅橫行市。如果重覆近年規律，恒指有機會好快橫行完，出現新趨勢。
另一種規律更值得留意，如果恒指出現四星期橫行走勢，下一段趨勢，通常會承接住橫行市之前四星期嘅趨勢而行。換言之，以每四星期為一組，「跌、橫行」之後，就會係跌；「升、橫行」之後，就會係升。2011年8月至10月歐債危機就係「跌、橫行、跌」嘅典型例子。
至於「升、橫行、升」嘅例子，就包括2013年6月至9月炒錢荒後反彈，同埋今年5月至8月炒滬港通嗰浸。
今年9月至今，恒指出現咗「跌、橫行」趨勢，如果重覆近四年規律，恒指9月至11月大概會係「跌、橫行、跌」，即係恒指稍後較大機會出現為期大約四星期嘅跌勢。會唔會破例出現「跌、橫行、升」咁呢？唔好意思，近四年未出現過，所以規律打破之前，睇圖應該要睇淡。
不過，晉佳近期見唔少同僚，港股持貨量都偏低，反映港股投資者取態偏向審慎。如果持貨量偏低，通常個市就向上挾到大家肯信為止。大家肯追貨，持貨量明顯增加，先至有條件再跌。
鐵路股攻守兼備
噚日內地A股爆升2%，帶動恒指升377點，大陽燭兼交投增加，論氣氛肯定係10月以嚟最好嘅一日。噚日五十大升幅股當中，有唔少係二、三線股，即係話，市面上短線機會好似多咗，股票已經開始向散戶招手，好似遍地有即抽即獎賺一成嘅機會，究竟會唔會係騙局呢？
通常恒指大陽燭之後，係龍係蛇，仲要睇埋之後嗰日，即係今日。如果今日又係大陽燭，或者裂口急升，後市仲有得炒吓。相反，如果跟住連續兩日恒指橫行，就證明噚日係見光死，派貨兩日之後就會下跌。
噚日連中鐵（390）、中鐵建（1186）都可以升7%，呢啲鐵路基建股通常喺跌市先嚟勁。晉佳回想起，曾經喺金融海嘯期間買中鐵，最終竟然係有錢賺，原因係市況唔好，中央就會使錢喺鐵路基建催谷經濟，變成中鐵喺內地經濟唔好嘅時候，往往可以接多咗定單，股價亦能夠逆市升。如果持股過少，冇貨喺手驚瞓唔着？呢啲就係進可攻、退可守嘅選擇。
晉佳
本欄逢周三刊登