同太太行新城市廣場，佢有時心癮起，會幫襯翡翠食拉麵同小籠包。我唔係唔鍾意呢兩樣嘢，而係我份人貪新鮮，來來去去擔擔麵、排骨麵，好悶呀！小籠包仲悶，鮮肉鮮肉鮮肉，最多豪啲叫蟹粉小籠，都係冇乜選擇。尋日佢又心癮起，本來諗住冇驚喜，點知估錯。小籠包多咗顏色，黑松露、口水雞、四季豆、芝士，橙黃綠黑，味道同平日食開好唔同。拉麵都唔似平日，多咗八款麵條揀，甚麼龍鬚、二細、大寬、雙溝、三角…粗幼形狀不一，即叫即做，又可以自己揀配料。太太揀咗蟹粉毛細麵，夥計係用三兩重太湖蟹拆肉的，落得夠重手，伴蔥油很香口，才$68，超抵。我食口水雞撈拉麵，用咗極幼龍鬚麵，蘸滿麻辣口水汁，爽！只見太太全程密密食，冇彈過一句，我就知佢滿意了。
地址：沙田正街18號新城市廣場3期樓A197b號舖
譚偉健
飲食記者，天生為食，愛講爛gag。愛吃唔愛做，但唔做冇錢吃，惟有繼續邊做邊吃。
潘紹聰X柳俊江
星期一至五 晚晚「搵鬼睇」
http://hk.apple.nextmedia.com/horror