現年50歲的吳啟華和29歲內地老婆石洋子結婚7年，育有6歲女兒吳熙兒，惟一家三口分隔三地，各有各生活，加上老夫嫩妻配的代溝，還有中港矛盾的衝突，最近驚爆兩人傳婚變。吳啟華昨接受本報訪問親口承認感情出問題，他正努力箍煲希望克服困難，現妻女跟他身在吉隆坡度假，終於齊齊整整一家團圓，啟華說：「問題一直存在好耐，唔會咁快解決到，不過大家盡量啦。」
曾經歷婚姻失敗的吳啟華，07年娶年輕21歲的長春姑娘石洋子為第二任老婆，翌年兩人生下女兒吳熙兒，表面上一家三口幸福滿瀉，怎知三人卻分隔三地、天各一方生活，不甘做煮飯婆的石洋子到北京發明星夢，女兒在長春老家由外祖母照顧，啟華則長期留在香港工作，夫妻感情難以維繫，近日兩人婚姻踏入7年之癢爆婚變，有指啟華作出最壞打算：「最worst咪離婚囉！」然而，上周六（25日）啟華到雲頂登台，原來妻女亦有同行，石洋子日前在微博貼身在馬來西亞的蒲吧相，看來兩夫妻正努力挽救婚姻。
度假散心挽婚姻
昨記者透過微信向啟華求證是否跟太太感情出現問題，他說：「其實呢啲嘢我已經喺微博講晒，你睇我微博都可以睇到啦。」問太太是否在大馬？他坦言：「係呀，𠵱家我哋一家人都喺大馬。」和好如初？啟華說：「問題一直存在好耐，唔會咁快解決到，不過大家盡量啦。今次主要係陪吓個女，好耐冇陪佢啦，會喺度玩多兩日，跟住仲會去塞班島玩幾日㖭。」
會否安排太太和囡囡來港居住，一家團圓？他無奈說：「呢個問題答唔到你住，未知點呀，其實我哋𠵱家討論緊讀書地點嘅問題，有決定再通知你呀。」有指香港讀書好過內地？他說：「呢樣嘢又唔可以肯定，因為好多教育界朋友話我知，𠵱家大陸學校好好，甚至好過香港，我哋讀國際學校邊度都差唔多，分別唔會咁大，不過我喺南方多啲，我梗係希望佢（囡囡）近我多啲，始終南方城市點都好過北方，北方冬天冰天雪地，同埋食物、人嘅質素各方面都係香港呢邊好啲嘅。」
微博反擊護老婆
問一家人在雲頂玩得開心嗎？啟華說：「雲頂冇乜玩，我哋𠵱家喺KL（吉隆坡）好啲，雲頂悶咗少少，天氣又凍，呢度天氣熱啲可以陪佢游水，我唔同你講啦，我要陪我個女游水，𠵱家我老婆俾雜誌寫嘅嘢搞到佢唔開心。」對於雜誌指嫩妻石洋子唔黐家，又喜愛夜蒲姣仔云云，啟華前晚在微博幫老婆反擊：「首先我要感謝關心我們的朋友們！我只能說我們之間的問題確實存在，不過大家都在努力克服困難，希望問題會得到解决！至於那些針對我妻子的不實報道，請大家不要相信！」
至於石洋子昨在微博貼手舞足蹈背影相並留言：「白天精神病，晚上玻璃（心）」似乎是說日頭很happy，晚上則變成脆弱，情緒起伏很大；石洋子的微博從沒貼老公和女兒的相片，反而愛晒身上的名牌如Hermès、Chanel、卡地亞、勞力士等，看來啟華很疼錫老婆。
採訪：皓騫
【相士話】麥玲玲：唔係太樂觀
半百之齡的吳啟華跟29歲嫩妻石洋子近日婚姻出問題，男方正努力箍煲，堪輿家麥玲玲和區仲德異口同聲指這段中港婚姻並不樂觀，不妨試用玄學方法化解。
麥玲玲昨在電話中說：「啟華命格好重，又忌火，去年同今年都火旺，感情會有波折，今、明兩年都會膠着狀態，到後年先好啲，都唔係太樂觀，佢哋唔會即刻散，拖拖拉拉。」麥玲玲建議啟華一家搬去較凍的地方生活。
區仲德則指肖龍啟華今年運勢與配偶有刑剋，到後年才有好轉，區仲德昨說：「可以試吓喺屋企西南桃花位放張夫妻合照，或插四枝鮮花，有助令感情和平啲。」
潘紹聰X柳俊江
星期一至五 晚晚「搵鬼睇」
http://hk.apple.nextmedia.com/horror
【三個粉絲去首爾】
追星實錄，即上韓劇讀： http://hk.apple.appledaily.com/kstar