百富環球（327）三年累升咗360%，一年計都升咗近150%，場內高陽科技（818）揸咗百富環球33%，高陽潛在增值，肥過肥仔水。
高陽上個月16日宣佈，以每股7.5元，出售百富環球8,000萬股，睇港交所（388）權益網，高陽兩日之後，搞掂呢壇製作，套現6億元。若果連埋高陽今年6月尾淨現金11.3億元，集團家陣嘅淨現金高達16.3億元。
所持百富升不停
高陽家陣仲揸住百富環球3.64億股或33.1%，百富環球現價（7.52元）計，等值27.3億元，連埋上邊淨現金，總值43.6億元，或高陽每股1.57元，係高陽現價（1.90元）82%！
百富環球經呢幾年大升，高陽所揸住百富環球權益，到家陣額外凸章17億元，高陽NAV去到1.6元，1.2倍PB。場內支付概念，中國創新支付（8083）PB講緊4倍、神州數字（8255）5倍，高陽平咗一截。
今年第二季開始，祖國整頓第三方支付瓣數，高陽由3月高位3.64元，跌返到家陣一年低位。但成件事咁睇，同樣喺第二季，祖國第三方移動支付市場交易規模，高達1.38億元人仔，而今年上半年，透過網上支付嘅用戶規模，去到2.92億人次，比起上年年底，增加咗12%。
尤其係智能電話普及、光纖入戶國策，又全國銀行發卡高達45億張，呢啲因素全部都互惠，進一步再刺激網購交易，而呢個兼且成為咗大勢，係生活其中一部份。所以，相信隨住規範同細則搞掂，高陽本身嘅第三方支付相關瓣數，會有運行，到時就啖啖肉。
呢轉先短炒高陽，當上返5月橫行頂2.5元，潛在回報率約莫30%，PB先得1.5倍，未有耐追到上邊行家。
錢雋
細價股專家
本欄逢周二、三、五刊出