社交網絡令人人都可以變身時事評論員，唔啱聽仲興unfriend㖭。有「新末日博士」之稱嘅紐約大學教授魯賓尼（Nouriel Roubini）最近就住美國西雅圖一單校園槍擊案，喺自己Twitter發表評論，直斥美國係一個極度病態嘅國家，唔知有冇人因此unfollow佢呢？
魯賓尼出名鍾意就時局發表個人意見，美國西雅圖附近一間高中上周五發生咗一單槍擊案，造成1死多人傷。槍擊案發生後幾個鐘，魯賓尼就喺Twitter度話：「美國人真是黐咗線：一名少年可以獲得一支步槍作為生日禮物。一個極度病態的國家。」
魯賓尼繼續講，造成如此局面，傳媒都有責任，因傳媒好少問點解咁易取得槍械。好明顯，魯賓尼係支持美國加強槍械管制。