馬會大董鄭維志旗下永泰地產（369）專做豪宅精品樓盤，最近就從太古地產（1972）挖走工程項目（香港）董事吳家煒（Kenneth），應該都係睇中佢做開同類型樓盤，啱嘴形喇。
永泰發展嘅項目算係貴精不貴多，公司持有不少優質地皮，包括九肚山兩幅豪宅地、屯門小秀項目同埋筲箕灣愛德街項目等；早前港鐵（066）拎將軍澳日出康城第5期出嚟招收發展意向書，永泰都有遞交意向書，唔輸蝕畀長實（001）、新地（016）等大發展商。
永泰從太地挖走嘅Kenneth就真係夠晒資深，今年已經58歲，喺太地做咗12年，負責本港所有新物業發展項目嘅設計同埋建造，包括每個單位都講緊幾個億嘅東半山OPUS（傲璇）。佢同永泰簽約3年，明年1月先至返工。