陳勳奇個女陳開心（原名陳杏妍）上周五（24日）喺將軍澳寶琳邨寶儉樓墮樓身亡，終年40歲。日前陳勳奇喺上海趕返香港為個女辦理身後事。噚日朝早8點15分，佢同老婆以及個仔到大圍富山公眾殮房認屍，一家三口全部戴口罩，但殮房仲未開門，佢哋只好喺門外等候。
早半小時到場
雖然陳勳奇戴住口罩，但見佢愁眉深鎖，神情哀傷咁四處踱步。平時好健談嘅佢，因為喪女之痛對他打擊太大，現場傳媒噚日上前問佢嘢，佢完全冇心情傾談。陳勳奇同家人等咗35分鐘，即8點50分先入到殮房認屍，逗留到9點35分，陳勳奇同太太由一名西裝男陪同出嚟，問佢有關個女嘅後事安排，以及個女係咪有情緒病等問題，佢依然粒聲唔講保持沉默。
墮樓現場拜祭
之後陳開心細佬同西裝男離開，見佢手上多咗個女裝手袋，估計係陳開心遺物，而西裝男個袋亦見到一對女裝鞋，估計亦都屬於陳開心。佢哋之後同個道士喺10時半去到寶琳邨寶儉樓陳開心墮樓現場拜祭，帶咗香燭、糯米雞同奶茶等祭品，陳開心細佬雙手合十又燒冥鏹，逗留約半粒鐘之後黯然離開。
撰文：馮仁昭
潘紹聰X柳俊江
星期一至五 晚晚「搵鬼睇」
http://hk.apple.nextmedia.com/horror
【三個粉絲去首爾】
追星實錄，即上韓劇讀： http://hk.apple.appledaily.com/kstar