樓市瘋狂，電單車位都有得炒。長實（001）九龍塘廣播道星輝豪庭一批電單車位倉底貨，上月被自己公司職員掃晒，仲要持貨短短7天「摩出」（完成交易前轉手），由47.6萬變90萬，一周速賺42.4萬，恨死打工仔。
兩年前全城出現盲搶車位潮，發展商一擁而上狂掟車位，長實最出位，連籮底橙電單車車位也攞出嚟畀人炒。其中星輝豪庭17個電單車位，2012年11月原以42.5萬元售出，但買家撻定。直至上月，這批電單車車位再度賣出。土地註冊處資料顯示，買家叫李健榮，上月11日以47.6萬購入，7日以後，即以90萬閃電「摩出」，一個禮拜炒貴近九成。新買家再加價近三成至115萬放售，今日拍賣。
據知，李健榮係長實營業部職員，人稱「榮少」。佢一向支持公司，舊年2月炒賣葵涌雍澄軒一單位賺逾30萬，惟項目拆售觸礁，最終撻定。