個幾月前，公關大姐大約左丁山吃午飯，地點唔係去慣去熟嘅蘇浙總會、上海總會、浙江軒，或者陸羽、Armani/Aqua呢啲，而係行路上荷李活道，再搵到一條好斜嘅伊利近街，由大道中行上去，真係行到身水身汗，上完斜路，有啲氣喘㖭。香港啲街道通常冇路牌，搵到街名算你夠運，不過以後只要記住，在荷李活道行行吓，見到一個好大好大嘅「民園麵家」（紅色）招牌，嗰條就係伊利近街嘞。
上咗斜路一半，經過一間印度餐館之後，就有一間好唔起眼嘅「緻好茶館」，正是店雅何須大，坐滿客人最多30人嘅小店，裏面裝修清爽乾淨雅致，樓底高，坐低就覺得幾舒服。嚟茶館喫茶乎？非也，大姐大話係董橋先生夫人讚好，帶佢嚟食過嘅，食完就覺得非要搵左丁山上去試吓不可。又好啫，茶館樓面只有兩人，一位係女侍應，一位就係老闆姓梁，梁老闆話佢父親幾十年前在青山容龍別墅外嘅海鮮市集賣雜貨，近水樓台得吃海上鮮，食得多就鍾意自己下廚，想不到數十年後就憑食藝廚藝餬口也，「緻好茶館」本來係純茶館，但香港人喜歡到星巴克飲即沖咖啡，就冇耐性在茶館吃茶，佢見勢色唔多妥，幾年前就轉型，以家常小菜奉客，賣的是真味道真新鮮，以及不扮藝術高深嘅紮實廚藝。
我地吃過煎魚餅、牛柳湯、菜肉雲吞、煎洋葱雞蛋薯餅，價錢不貴，幾合理，兩人難以吃得完，大姐大要打包回家再吃。
有此經驗，上星期約新亞師弟陸錦榮吃飯，又去「緻好茶館」箒，陸師弟吃完，讚賞不已，話佢兩口子住在半山，步行十幾分鐘可至伊利近街，以後如果太太唔得閒煮飯，可拍拖來此食家庭風味菜（其實陸太試完後，可能乘機唔再煮飯，費事洗碗吖嘛），吃吃吓，有客人行埋櫃枱埋單，舉頭一望，此人正是地產F或酒店F，佢係上市公司CEO，公司旗下在灣仔有酒店，酒店內有米芝蓮級星級餐廳，等同福臨門、七福嗰類，呢日竟與老友來此吃午飯，顯見此茶館別有吸引力。打完招呼之後，酒店F要左丁山同佢講幾句佔中反佔中最新情況分析，左丁山本來所知有限，老友叫到，唯有做吓南郭先生，然後拜拜而去。半小時後，左丁山叫埋單，老闆娘話：「嗰位先生同你找咗數嘞！」哦，本以為請陸錦榮吃飯，點知酒店F請咗我地吃飯，幾唔好意思噃！