李澤楷有意收購AC米蘭？日前喺網上流傳話喺周日AC米蘭主場迎戰費倫天拿場意甲聯賽，有位叫Richard Lee嘅華人坐喺班主貝盧斯科尼隔籬一齊睇波。唔係話吓？唔通小小超有興趣做歐洲勁旅班主？原來呢個只係美麗嘅誤會，佢並唔係李澤楷，呢位李先生其實叫李文輝，專做法拉利跑車買賣生意。據報李先生會同A米主席芭芭拉，傾收購球會部份股份事宜。
費托意甲依然廢
另外，AC米蘭今季只係輸過1場，戰績算係不過不失；周日聯賽主場迎戰費倫天拿就畀對手以1:1逼和。隊波成績尚可，但今季加盟諗住喺度翻生嘅費蘭度托利斯就依然冇起色。費托今季喺A米仍然只得1球進賬，對費倫場波已經被貶為後備。佢喺僅得10分鐘上陣時間內都有射門機會，但第一時間抽射，個波莫講話唔中目標，連底線都冇出就咁打橫飛咗去禁區左邊，認真唔掂。
識睇，一定係睇足英台【英波Live】：
http://soccer.appledaily.com
http://bit.ly/engballlive