噚日中國智能（395）忽然爆出被阿里相中，合作搞雲端項目，即時一登龍門。身邊有唔少朋友，包括本欄某前鄰居都話要狗衝，點知見到佢高開7%就開始淆底，睇住佢升一成幾又覺得：「算啦，都升咗咁多，應該冇乜肉食。」去到五成時，睇住佢升自己又冇份，心情低落過輸錢，最後佢同我講要將隻股加入「確信跳樓名單」。買呢類股，老套講句，要抱視死如歸嘅決心，當賭大細，決定衝就唔好諗，即做價買。同自己講嚴守止蝕，就算賭輸咗都唔會太傷。
其實搞startup都有賭博成份，都係要有視死如歸嘅精神，唔知自己個business model得唔得之餘，仲要預咗頭兩年冇乜cash flow。最近識咗啲搞startup嘅人，發現佢哋好多時面對同一個問題，就係唔識點做pitching。做pitching有禮貌係應該，但唔少人有禮貌到畀人一種求人科水嘅感覺。查實投資係一買一賣，雙方關係對等，冇必要自眨身價。前輩講過，好多時成功嘅startup做presentation時，係會有一種「你唔投資我係你蝕底」嘅氣勢。如果你真心信自己條橋得，有一定嘅高傲先係應有態度。
另外，要搵一個好mentor。揀錯的話隨時行錯路，同埋唔好盲從佢哋嘅意見，記住盤生意係自己，佢哋冇需要為意見負責，但你係有責任為自己嘅創業夢負責。
Fifi
http://www.facebook.com/lovefrystock
本欄逢周二、四刊出