除咗機場同埋飛機上面，有乜嘢地方可以輕易「巧遇」空姐、空少呢？咪就係佢哋住嘅地方囉。聽空姐朋友講，最受空姐、空少歡迎嘅租盤分別係馬灣珀麗灣、東涌藍天海岸、屯門黃金海岸。
東涌雖然就近機場，但未必係空姐嘅租住首選，事關唔係人人都想住得咁近返工嘅地方。聽聞，其中一個最受空姐同機師歡迎嘅地區係馬灣，除咗標榜「無煙島」嘅環境之外，佢哋對珀麗灣第17座仲情有獨鍾㖭，原因係呢座最多一房單位，月租1.1萬、1.2萬元，啱晒佢哋budget。
而且，喺第17座嘅大堂門口，對出巴士站就有架巴士直達國泰城，即係一落樓下就可以有車搭，去機場，車程大概20分鐘，真係瞓晏咗都唔使驚。
雖然話島上環境唔錯，但好多本地空姐亦會睇餸食飯，因應公司畀嘅房屋津貼去揀樓租，東涌𠵱家唯一有一房嘅樓盤係藍天海岸，388平方呎嘅一房細單位，亦係空姐空少們嘅搶租目標。
機師愛租東涌House
至於機師或高級機組人員，房津較多，聞說佢哋鍾意租House，好似東涌嘅海珀名邸，同埋水藍天，都有月租7萬至8萬嘅House出租，啱晒佢哋脾胃。東薈城有唔少航空公司嘅後勤寫字樓，唔少行政人員亦會貪方便，喺區內搵租盤，慳埋車費。
唔近機場嘅屯門黃金海岸亦有好多空姐空少租住，因為國泰航空（293）多年之前已經跟信置（083）承包咗黃金海岸大約200個單位，主要租畀公司嘅外籍機組人員居住，所以呢度亦可能遇上好多靚人㗎。
李華華
mailto:[email protected]