有得睇冇得打，正好形容香港拳手曹星如噚日嘅經歷。難得偶像帕奎奧（Manny）去到中環一間拳館練習，星如同澳門嘅吳國權明明都同場，點知3人只能分別喺唔同時間自己練習，星如話：「知道Manny難得來香港，期待咗好耐要同佢對練，點知冇得對練，好唔開心。」
冇得對練 拎簽名補數
「不過能夠近距離睇到Manny嘅技術，佢嘅出拳速度同密度，令我有更清晰嘅方向去提升自己。」星如喺Manny同著名教練羅奇練習時，同經理人劉志遠企喺場邊專心睇偶像練習，之後仲攞到簽名㖭：「係呀，喺Manny面前，我變咗做個小粉絲。」
星如同帕奎奧下月23號將會喺威尼斯人舉行嘅「金光決戰2」，分別出戰日本同美國拳手；爭取15連勝嘅星如，噚日仲得到推廣公司老闆Bob Arum確認，出年2月會先打一場世界金腰帶資格賽，贏咗嘅話6月就會爭奪世界冠軍金腰帶。星如話：「無論幾時爭世界冠軍，我都期望每場比賽有進步。」資深體育評述員韋基舜噚日都有應邀出席，佢話星如要挑戰世界冠軍，首要練出一套致命拳術喎。
識睇，一定係睇足英台【英波Live】：
http://soccer.appledaily.com
http://bit.ly/engballlive