有三個冧巴近月傷盡散戶心，更被坊間批為冧巴降，玩殘唔少散戶，三個冧巴係1、3、9。順序落嘅139係中國微電子，爆升之後嘅9月橫行，徘徊喺1蚊，射催淚彈都射佢唔死，點知近7個交易日暴跌，噚日又跌17%，市值得番8.71億元，同高峯時嘅50億元相比，短時間內冇咗40億元，呢隻股應該可以體現均衡參與，因為「完全冇經濟效益」。
將呢三冧巴倒轉，931，就係中國天然氣，曾經單日掂過3蚊即刻暴跌七成，然後又神奇咁上返去，最新報1.47蚊，高位衝入去嘅話已經冇咗一半。
呢三個冧巴，並不是省油的燈，再數仲有合一投資（913），又係高位暴跌八成幾，近兩日反彈，噚日第二棍再升33%，𠵱家0.117蚊，華華不禁倒抽一口涼氣：嘩，大佬，點跟呀！
至於呢幾個冧巴係咪咁邪？原來，最近6期六合彩，開過兩次1，兩次9。六合彩又唔見我中，華華想問：「公平喺邊度？」電視傳嚟蔣麗芸嘅聲音：「嗱，我可以首先一樣嘢啦…即係…ER…OK……」