擁有銅鑼灣SOGO的利福國際（1212），早前停牌近一個月，上星期揭盅，只係大股東賣股畀卡塔爾投資局。點解一宗賣舊股、唔涉及重組的交易，要搞足一個月，時間明顯比類似的交易來得長。到底係雙方講價講耐咗，定係一開始的計劃，並唔只呢3頁紙咁簡單呢？
利福的控股股東Real Reward（RR），是由CEO劉鑾鴻（細劉）及純官主理的周大福企業共同持有50%，市場一直認為周大福會逐步離場，細劉如啱價亦唔介意增持，但他似乎唔想觸及GO（General Offer，一般要約）的界線。無論如何，今次RR賣股予卡塔爾，帶出了兩個訊息：1.是次作價低過去年10月周大福減持、細劉接貨的價格，兩位股東低位出貨，無論之後是否有後着，他們看淡本港零售的想法明顯。2.這次股權變動後，細劉仍為大股東，持股32.27%，但第二大股東則由持股19.9%的卡塔爾取代，周大福實質權益只剩16.1%。
咁卡塔爾投資利福為乜呢？投資內地百貨業？利福90%盈利仍來自銅鑼灣SOGO，內地業務低迷，海迪認為冇乜說服力。或者，希慎廣場近年的重建已提醒大家，銅鑼灣真係一個「舊區」，例如駱克道舊樓早已被有心人落晒釘等重建。如果你相信SOGO有同樣concept，那可能才是卡塔爾終有一日會用到的exit strategy。
海迪