周日德甲壓軸一場波上演榜首大戰,次席嘅慕遜加柏主場迎戰1哥拜仁慕尼黑,結果0:0和局收場。拜仁教練哥迪奧拿喺補時階段唔知心急定搏大霧,走去叫女第4裁判施汀侯絲補足時間嘅時候,又搭膊頭又攬腰,波就冇得入,但水就畀哥帥抽晒。
拜仁喺賽前氣勢如虹,德甲4連勝兼且啱啱喺歐聯7個一皮狂勝羅馬;之不過慕遜加柏坐得喺第2位亦唔係流,佢哋今季喺聯賽加埋歐戰都一樣係保持不敗,周日喺主場迎戰拜仁實行打穩守突擊,守得住你之餘幾次反擊都好有威脅,場波各得1分收場算係合理。
拜仁悶和慕軍
可以喺拜仁身上拎到1分其實已算係成功,所以慕遜球員踢到補時階段,都借啲意拖吓時間,跌落地下都要碌多幾個圈先起番身,搞到哥迪奧拿好不滿。哥帥嬲嬲哋走去第4裁判隔離,叫呢位女裁判施汀侯絲要補足時間;用口講都唔夠仲出埋手,搭去對方個膊頭度,施汀侯絲心諗同你好熟咩,一手掃開哥帥隻手。哥帥彈開幾米之後,又手舞足蹈睇錶嘈嘈閉,再行番埋施汀侯絲隔離去理論,今次唔搭膊頭但隻左手放咗去人哋條腰度。喂,一次就話係唔小心,連續兩次摸身摸勢就惹人懷疑;人哋話晒係女仕,莊重啲好喎。哥帥賽後冷靜番啲,話和局收場都係滿意賽果,亦大讚門將紐亞表現出色勇救險球。講開紐亞,最近傳佢同女友嘉芙蓮鬧分手,好在冇影響表現。
女球證試過被胸襲
今次事件「受害者」施汀侯絲其實來頭唔少,現年35歲嘅佢係德國球壇首個職業女球證,喺唔少大型女子國際賽做過球證,亦喺德乙聯賽吹過雞。球迷可能對幾年前「鹹豬手」事件仍然有印象,喺4年前一場哈化柏林對亞琛嘅德乙聯賽,哈化球員尼美亞一時唔醒起執法球證係女人,拍咗施汀侯絲心口一下,搞到阿絲姐好尷尬傻笑。今次哥帥搭膊頭兼攬腰,施汀侯絲梗識點去應付嘞。
識睇,一定係睇足英台【英波Live】:
http://soccer.appledaily.com
http://bit.ly/engballlive