有傳媒話狼英喺今個月10號，同成班保皇黨喺禮賓府商討點對付佔領行動時，席間有人提出搞到今日咁嘅局面，係拜中學生讀通識科讀得太多、令學生公民覺醒、政治意識提高所致，所以建議刪減通識科政治內容、將通識改做選修科。到底邊個向狼英提出呢個要求？八方噚日問過建制派，發現兩個嫌疑犯，但鼠王芬堅持當晚冇講過，Tree根則話唔會回應《蘋果》問題。
鼠王芬矢口否認自己當晚有發表要整頓通識科嘅意見，話自己當晚只提出政府要同學生對話，但佢強調，自己一向都反對通識科列作必修科，因為無論通識科老師嘅水平、教材、課程統統都唔掂，過去五年一直公開提出要整治呢科。有建制派就話Tree根先係始作俑者，但Tree根一聽到八方來電就話要杯葛《蘋果》，然後收線，八方都查唔到究竟佢係咪真兇。