梁振英大做國際公關，兩次邀請國際著名媒體到禮賓府吹風，誰知連續兩次發言失誤，據「信報」專欄余錦言說，特首辦連續發表聲明澄清，好彩，特首辦尚未敢諉過於人，指外國記者引述錯誤，斷章取義啫。
呢日在中華總商會俱樂部吃午飯，在座諸君幾乎盡是反佔中建制派，但呢日嘅談話焦點係14000元，而唔係佔中反佔中，14000元月薪呢排人人琅琅上口，記者G話佢嘅fb留言滿是新聞系同學、行家埋怨：「唔怪得我地冇選票，我地記者月薪低過萬四蚊呀！」有冇選票與月薪其實冇關係，只係我地特首夠膽對外國記者講「廣泛代表性」不是數字遊戲，好似係盡吐心中情咁款，唔怪得有人封佢係說話最坦白嘅政客！在外國任何一個一人一票選議員、選總統嘅地方，邊個政客敢膽如此公然公開歧視窮人基層嘅選舉權，會在一個星期內鞠躬道歉下台，兼俾工會鬧到七彩，只有在取得689票便可做特首嘅香港，領導人先至可以講出呢番說話而不須負上任何政治後果。
同枱食飯嘅建制派對梁振英此番話，皆不以為然，指CY令到佢嘅基本擁躉工聯會非常難做，陳婉嫻都不知如何向佢嘅基層選民交代，只能暗啞抵！分分鐘背人垂淚。好彩，或者陳婉嫻啲支持者不屑睇CNN呢，否則見到條新聞標題：The poor pose election risk, says Hong Kong's leader（Charles Riley，10月21日）就會撞晒火，要求嫻姐解釋為何窮人會帶來選舉風險。
梁振英對外國記者又講到可能考慮擴大選委會四大組別之選民基礎，有傳言話係取消公司選票，改為界別行業中人一人一票，飯局中人多數唔信政府會咁大膽，但佢地幾乎全部認同最低限度四大界別內之公司票可以改為公司董事票、一董事一票，不是一公司一票，但董事必須係本港永久居民，譬如有啲銀行在香港註冊成立公司，董事全是外地派嚟嘅高級職員，如果佢地唔係香港永久居民嘅話，就不能投票。對選委會（提名委員會）即使係如此小修小補，梁振英係唔係真正有膽向中南海提出呢？幾難講。控制成性嘅中南海迷戀「零風險」，不要「外部勢力干預香港」之心魔一日不除，一日不會放鬆，正是寧左勿右吖嘛！