上周講了策略係「高沽低唔加」，直至期指升穿23405，改為不作對沖，升穿23527，就會相信柳暗花明局開始。一周過去，只差23527一步，其他全部做齊，又係時候回顧好淡力量及市場節奏，再去安排本周部署。上周一按策略高沽後，周二學聯和政府對話，對話前，當然有人會擔心，所以大市在星期一出現了一支陰燭，不過，我在金鐘辦公，經常見到那些學生，聽他們說話都覺得算是比較理性，有信心對話不會出太大亂子，所以跌了下來可以轉股票為call，在不加倉下博一博。
對話沒有實際成果，其實是所有人預期之內，不過，我覺得學生同官員嘅表現其實都算合格，無論係抗爭者還是政府，至少都能夠保持溫文有禮嘅態度，為未來繼續對話預留了道路，從另一個角度看，亦可以說佔中運動已逐漸進入收局階段，而不確定性減少之下，港股應越來越接近單邊突破的時機，是時候做好準備。期指在星期三升穿23405時，我偷步加注，因為擔心一宣佈滬港通開通時大市會一針飆咗上去而追唔到， 結果擔心只屬杯弓蛇影，而上星期三至五，個市維持反反覆覆，一陣PMI，一陣伊波拉，美股又忽升忽跌，之不過，睇美股陰燭完又破頂嘅走勢，我維持美股見咗底嘅說法。
領匯是佔中受惠股
先前嘅拆局係基於佔中、美股同滬港通走勢去睇，現在前兩者正面，只差後者開通，側聞無限期押後，本已難估，但現在再新加一個變數，就係紐約出現首宗伊波拉確診個案。伊波拉疫情在西非有幾嚴重，我諗就唔使我再講，而經歷過97禽流感、03沙士、09豬流感、變種禽流感嘅香港人，應該理解到，防疫係要全力去做，但冇人可以擔保唔擴散，而擴散嘅影響，次次唔同，事前根本冇乜估算嘅準則。
紐約出現伊波拉個案，但家陣就擔心全面擴散，係言之過早，紐約出現病毒，標指跌10幾點，港股就曾跌近300點，美股晚上收復失地，港股夜期仍只是拉牛上樹，很明顯港股現階段比美股弱，因美股上月曾大跌，而業績期表現卻見得人，所以伊波拉只係幌子，內裏是有人唔希望佔中影響國家開放人民幣的大局，怕滬港通要拖一段時間，要等正式清場，才能開通，所以高位沽點，現階段美股值博率比港股強，有玩開美股的，不妨將手上示弱的個股，轉揸美股甚至美期，直至盤中升穿23527，並企穩，到時就唔係將美股轉回來，而係追揸港股，實行美股港股兩邊揸，若真能突破，相信24300會是最低消費了; 當然，唔係人人喜歡玩美股，港股也可以炒賣殼、炒國策，但若鍾情大股，又怕錯失低位上車機會，不妨留意轉趨強勢的領匯（823） ，佔中大家少出油尖旺角銅鑼灣，留在屋苑消費，領匯屋苑遠離佔領區，可以話係少有佔中受惠股，滬港通無乜炒個領匯，押後開通對他影響較微。
加上他日轉藍籌及美國未能加息，又冇大孖沙股東受到點名批評之下，相對其他大股強勢，不失為寓守於攻之選。
註：筆者持有領匯。
張士佳