佔領運動遍地開花，寫下香港民主歷史新一頁，喺呢嗰咁緊要嘅歷史時刻，全港各大傳媒精英盡出，用相機、文字、影片記錄每一個新聞事件。行家們無論記者定攝記最少日做12粒鐘，仲要食催淚彈、中胡椒噴霧，𠵱家仲要俾反佔中、藍絲帶暴民圍毆，條命仔隨時凍過水。
三色台雙工 Cable有補假
八方聽聞，有傳媒機構都好窩心，對捱更抵夜採訪佔領運動嘅同事，發放特別獎金同補假補償兼鼓勵一下。好似三色台嘅行家，原本每日返10粒鐘，佔中開席後日日OT，所以採訪佔中新聞，每日人工雙計，仲有飯錢30蚊，唔使食麥記咁慘；小小超嘅now TV，就每日多250蚊，亦都有40蚊飯錢。至於走在最前線嘅有線新聞部，返4日工就有1日補假，等記者搏殺完後有足夠時間唞一唞。
報紙行家都唔輸蝕，當然只係部份啦！有傳大紫荊報送金牌、「正義傳媒」就有額外獎金。咦，八方嘅同事，佔領期間都閒閒地日做至少13、14粒鐘，攝記大哥仲辛苦，開席初期日日踩足20幾粒鐘，返屋企沖個涼瞓一陣又要上戰場，八方聽聞佔領運動結束後，《蘋果》同事應該會享有補假安排嘅，唔知老總沙膽虹，會唔會有啲表示呢？
李八方
mailto:[email protected]