HMV中環娛樂行旗艦店噚日舉行開幕禮，老闆高誠資本（8088）首席執行官胡景邵（Kelvin）透露，話𠵱家申請緊酒牌，估計最快11月成事，之後可能考慮延長營業時間，仿效誠品咁做24小時。
HMV呢間旗艦店位處中環心臟地帶，7月裝修完到𠵱家，學Kelvin話齋，呢段時間都算風雨飄搖，由於交通不便，市民情緒低落，所以呢間舖嘅生意額亦跌咗差唔多兩成。Kelvin期望，年底聖誕傳統旺季可以一次過賺番晒。
對於佔中，佢話個人支持對香港繁榮好嘅事，自己作為一名香港仔，佢話唔想社會亂，講講吓又話，做生意都係不談政治咁話。話雖如此，影相嗰陣，佢無端端好搞鬼咁問攝影師「使唔使拎把遮？」唔知Kelvin想拎黃色遮定藍色遮呢？