絕不是想補鑊，更沒有擦鞋的意圖，純粹想本着良心說句心底話：如果你問我，要在芸芸財經評論員當中，選一個我認為最有叫座力和說服力的，我諗都唔使諗，胡孟青。
誠然，我無可能睇過或聽過晒所有財經評論員嘅表演，但最有代表性嘅嗰幾位，心裏總有點印象。That's right，只是有點印象，但就是那一點點印象已經足夠。如今是2014年，資訊以超音速之快互相傳遞，睇人又好，識朋友又好，已經無乜時間坐喺度慢慢分析深入了解，好多時候靠嗰丁點兒印象，就已經要make a call，and of course，ideally，make the right call。叫座力和說服力加起來，就是魅力，而我說胡孟青是全香港最有魅力的財經評論員，肯定是個right call。
我不想整篇文章也在胡孟青前胡孟青後的，所以有關青姐的成功之道，想在三段以內作個總結。五十日移動平均線喺邊，嗰條陰燭插喺邊，呢條陽燭又棟喺邊，一號仔五號仔八號仔，跌穿邊個位大行就會沽。
越有信心 就越多信徒
財經評論員嚟嚟去去都係嗰幾句，講中咗嘅嘢就廿幾年前都攞返出嚟威，累到人返屋企搭車都無錢嗰啲就時運低乜都記唔到，有邊個財評唔係咁？講真，就算係咁，so what？因為private banker都係咁，超級富豪都係咁，政治家都係咁。唔通，叻嘅嘢收收埋埋，瘀嘅嘢先拎出嚟講？如果你真係好事不出門醜事傳千里嗰種人嘅話，你真係非常之獨一無二，係獨一無二咁戇居。
講到青姐咁有魅力，咁青姐講嘅嘢，同其他財評有乜嘢唔同？答案係，無乜唔同，差唔多一模一樣。咁係唔係青姐睇個市睇得準啲？呢個，我唔敢講，你可以問番聽過青姐意見而買股票嘅散戶。既然乜都唔係，咁青姐叻喺邊度？兩個字，信心。為咗寫呢篇，我做咗少少功課，去Youtube睇咗青姐以前一啲財評短片。
那時候的青姐，已經有今天清脆的聲線和專業的語氣，但眼神還是有點青澀的含羞答答。「咁存咗錢入嚟，呢啲銀行都要識得搵個渠道去放款喎。」青姐說得溫柔，清純得像個剛在教育學院畢業的幼稚園教師，低一低頭，又望着鏡頭笑一笑，「卡娃衣呢」，但完全沒有今天的氣派。然後青姐一做就是這麼多年，她的粉絲以不尋常的速度上升，原因肯定不是她比以前更專業，而是因為她越來越有信心。真係要扮一扮鬼仔，因為我唔知中文點講，但青姐今天直情建立了一種effortless style，透過大氣電波也可以感受到她灼熱的自信。越有信心，她就說得越精采，越精采，就越多信徒。
我從來不認為自信是與生俱來的，你看青姐，走過這麼長的一段路，才醞釀出今時今日的霸氣。當年的我也是一樣，在私人銀行當暑期工，唔好話對住大老細，我對住年紀比我大幾年嘅所謂supervisor，已經有啲口震震，就跟那時候的青姐一樣，含羞答答，「卡娃衣呢」。原因好簡單，初嚟埗到，個人好無信心。對住班朋友就話牙擦擦啫，要我對住一個二個經驗豐富嘅金融精英，我真係驚到連㩒部影印機都驚㩒錯。
學聯超班 高官輸尊嚴
很自然地，我把當年的我投射到一班學聯成員身上。大佬，你哋喺自己地頭，喺其他學生面前，梗係可以嗌晒口號係威係勢啦，但對住班政府高官，你哋得唔得呀？幾十年政治生涯，由AO做上嚟嘅又有，做資深大律師嘅又有，你哋幾個𡃁仔𡃁妹，牌面都輸晒，仲學人對話？就舉岑敖暉為例，他還沒參與社會運動之前，只是一個得閒打吓機、打吓波、上吓高登嘅宅男，所謂的政治經驗佢有幾多？頂多三年。喂，只是三年貨仔，想同人哋三十年功力玩埋身肉搏？未瘀過呀？
點知，原來未瘀過嘅，係邱局長。你哋唔好鬧佢，對話期間，我睇得出佢真係好畀心機聽對家講嘢，眉宇間，我睇得出佢個腦真係喺度load緊，但可惜佢真係load唔切，對話開始咗冇半個鐘，佢個樣已經好似load到得番半格電咁。江華就更加唔使講，人哋一開波佢就已經熄咗機。點解邱生同劉生會搞成咁？講真，爛船都總會有三斤釘，我點都唔信佢哋真係冇準備過，一兩頁A4紙嘅對白梗會有啩，但係佢哋全場靜坐，係因為佢哋冇咗信心。
我明，學聯那邊，尤其是岑敖暉和梁麗幗，的確打出超水準表現，咁但係你哋都唔使驚到咁啫。佢哋幾個，𡃁仔而已，對住一班𡃁仔，你兩個都可以冇信心到咁？大哥，你哋開始入政府做嘢嗰陣，嗰幾個學聯仔先啱啱出世咋。現在終於明白，為甚麼要政府代表我們向中央提出訴求，是如此困難的一件事。你對住班後生仔都驚到咁，如果習主席企喺你面前，你仲唔當場休克？我交咁多稅畀你，你平時冇乜貢獻我都唔會投訴，宜家難得有場免費戲睇吓，我身為納稅人一定支持政府㗎。但估唔到你連對白都懶得念一句，你係唔係應該考慮向納稅人回水呢？
好耐之前有齣電視劇，羅嘉良飾演嘅葉榮添有句口頭禪：「乜嘢都可以輸，信心唔可以輸」。曾經到瑞士開會，聽過那邊的高層說過一句話，絕對值得細味咀嚼。她說：「自信的價值，就是它能夠讓你在反對你的人面前，仍然保持着自己的魅力，從而繼續獲得他們的尊重。」一個人出來社會做事，怎可能得到所有人的認同？從政又好，打工又好，一定有人支持你，也一定有人反對你。失去支持，你都仲可以繼續玩；但當你失去尊嚴，你仲邊會有面繼續玩落去？
葉朗程