「你老竇發爛渣鬧你冇大冇細態度極惡劣，兼鏟我做壞榜樣所以你唔尊重佢！你冇禮貌唔啱係事實，你要檢討！佢得唔到尊重亦係事實，但佢絕對大男人，係絕對唔會自我檢討，亦唔會認為有檢討需要，所以結局永遠是失敗。你要以佢做榜樣有樣學樣只識發脾氣永遠都係別人的錯冇問題，或之你幾天才橫溢幾醒都冇用，我寫包單你嘅下場只能係一樣，就係失敗！你大個仔了，有主見了，但唔代表唔需要識禮貌尊重，尤其對長輩！玩性格，你有冇本事條件？你阿媽我付出咗幾多血汗同埋幾高代價，先有今日的份量同資格？而我，即使叫做有地位份量，依然要忍讓退讓，仍然在學習當中，你呢？」
「我根本冇話佢怪佢，係佢無啦啦就話我怪佢，我同佢講好多次佢都冇聽！佢出晒名唔聽人講，只得佢講！我一開頭根本冇、係佢怪我先囉、乜都係我錯囉！」
「你嘅講法，同佢一模一樣！最後三句係字字一樣！先自我反省檢討先有資格講其他！」
「我冇講大話，佢呃人！」
「你完全捉錯用神，你兩個互相推卸，總係佢唔啱先，所以先發脾氣之嘛！發脾氣能解決事情嗎？你根本冇冷靜好好想想我嘅說話，被憤怒蓋過理智，你究竟同邊個過唔去？」
「我同佢講咗sorry啦！我都知我有錯，但係我肯定佢講嘅嘢有偏頗囉！」
「佢份人係點你一早知，佢企硬佢冇問題冇錯，再同佢爭論有意思嗎？經過咗咁多次磨擦，你有冇長過些少智慧？日後點樣相見相處？問你癲得幾多次？你以為你可以改變得到邊個？我哋只可以改變自己點樣去應付面對嘅態度，而唔係俾佢牽動牽制。呢一點你一日想唔通，一日都成不了大器！」
張慧敏
http://www.facebook.com/HKcareerdoctor