呢日係季內首個本地G2(二級賽)賽日，兩場盃賽好戲在後頭，第八場1200米精英碗，結果潘頓策騎4倍大熱門「友瑩格」後上奪標，個人捧盃完成帽子戲法，為呢匹蘇保羅鎮倉寶打響今季頭炮，馬兒上季至今八戰六W兩P，在港累積六捷清一色贏田草1200米，矛頭直指12月初香港短途錦標；二、三名分別「積多福」及「醒目波幅」。
「友瑩格」今仗神乎其技，高手過招場合出閘向上跳躍因而大脫腳，以為輸梗，末段竟能從內欄後來居上反敗為勝，力壓落飛馬「積多福」同半冷門「醒目波幅」，勇奪今季首項本地G2錦標精英碗，「醒目波幅」轉彎大蝕位，最終影相飲恨，鄭雨滇未能夠喺停賽18個賽日前贏大賽補數，全日兩度上名冇入過凱旋門。另一邊廂，大摩上屆出六駒並憑「綽力之城」勝出精英碗，今場四路興兵，結果1至4號旗下四匹全場最高分馬全軍覆沒，當中着啡燈開跑嘅「步步友」曾缺課兼1200米路短仍得第四，僅輸一身位，表現其實比預期好。
「友瑩格」馬主楊毅說：「『友瑩格』今仗慢閘絕非戰略，我睇到心都離埋，十分緊張，牠竟然可以後追多個馬位，末段力壓對手勝出，令我非常驚訝。此駒仍在進步之中，令我很開心，下仗將跑11月23日同程二級賽馬會短途錦標，終極目標是12月香港短途錦標，希望為港爭光。」