本屆沙田錦標賽日，見證潘頓打造單日代表作，第八場他以「友瑩格」後上贏1200米精英碗，第九場佢用同一跑法，將方廐「軍事出擊」留前鬥後，結果贏埋1600米東方表行沙田錦標，一手包辦全日兩項G2二級賽；連同較早場次之「威風猛將」及「靚猴王」，呢位應屆冠軍騎師，跑完第九場已經四喜臨門，鎖定騎師王勝局，兼追到騎師榜第一位雷神氣咳。
今屆沙田錦標歷史性有三代馬王同場列陣，包括大前季馬王「雄心威龍」、前季馬王「軍事出擊」及應屆馬王「威爾頓」，加埋出爐慶典盃盟主「大運財」，被喻為神級大戰。結果新不如舊，事關「大運財」做二奶，畀「軍事出擊」最後一步擒下，2倍之「威爾頓」更加大熱倒灶輸到離行離列。相反分別久休半年及年半復出之「軍事出擊」及「雄心威龍」勝出及跑第三，「軍事出擊」由摩廐轉方嘉柏馬房初出即贏大賽，來港至今累積九捷七勝分級賽(包括去年稱霸新航國際盃)，14倍W亦是歷來最冷一次，馬主梁芷珊與丈夫羅傑承齊齊領獎，一吐多時悶氣，而方嘉柏連頭場有「澤心星」初出即贏在內，整日起孖兼捧盃，亦成為表現最佳練馬師。
另一方面，大摩輸開有條路，沙田錦標出夠五駒，後備補出之「同個世界」跑第六，竟係名次最佳一駒。總結摩廐於今年精英碗及沙田錦標出馬共九匹，僅憑「步步友」跑第四拎到少許獎金，馬房表現之差令人震驚。