94歲嘅港龍航空創辦人曹光彪噚日難得現身喺沙田馬場，仲威水到可以落凱旋門拉頭馬，呢隻馬仔咁啱就係叫做「威水」。不過，曹光彪始終年紀大，呢隻馬仔「威水」勝出之後，一班親朋戚友要半扶半抬曹光彪落去凱旋門影相，唔知道係咪扶得佢唔舒服，兼且現場曬曬哋，曹光彪狀甚辛苦，不過企到埋去凱旋門就乜事都冇。
馬仔愛以「威」字命名
雖然曹光彪養馬多年，但係對上一次拉頭馬已經係2011年1月底嘅事，當年隻「永新勝利」贏出，噚日再贏馬都算係守得雲開見月明。
除咗「威水」，曹光彪𠵱家仲有隻「威龍」。睇番佢退咗役嘅馬仔，基本上都係「威」字行頭居多，希望佢繼續贏馬，有得威威喇。