《新華社》前日無端端登出一篇英文署名文章，點名指恒地（012）主席李兆基、九龍倉（004）主席吳光正、「糖王」郭鶴年等人未有公開表態反對佔領運動，雖然呢篇文章即晚被刪除，但喺地產公關界已經引起好大迴響。
公關阿哥阿姐都話，除咗幾位「梁粉」大孖沙一定要出面力撐狼英之外，唔少大孖沙其實都希望喺政治議題上保持低調，唔想得失任何一方，尤其係𠵱家佔中形勢唔多明朗，萬一講得唔好，刺激示威者走去包圍佢哋嘅商場、物業、店舖，咁就大件事嘞。
有份被點名嘅四叔可能更加摸不着頭腦，佢喺佔中啟動前，唔止一次批評佔中。可惜吖，原本四叔明天有個傳媒高層飯局，上星期中忽然話要延期，如果唔係，四叔明天咪有機會即刻出嚟高調反佔中囉。