【本報訊】紛亂時局正在催逼黃之鋒長大，9月至今，他發動中學生罷課、公民抗命、被捕、登上《時代》封面、在帳篷裏度過18歲生辰、把波鞋當枕頭睡在彌敦道。但在他眼中，反而是佔領者正在極速「進化」，過去30天展現的爆發力遠超想像，「每個人都太睇小香港人。今次無論邊個學生上封面，都象徵住香港青年嘅抗爭，終於上咗國際政治舞台」。
黃之鋒至今依然相信，成為封面人物只是巧合，「我懷疑佢（《時代》周刊記者）純粹想搵個學運領袖，只係打唔通畀周永康同岑敖暉。冇乜好大感覺，買咗本返屋企，好鬼貴，擺喺書枱側邊。」
以往外國傳媒只懂找陳方安生和劉慧卿，現在蜂擁去找他，「其實外媒唔係好知發生乜事，成日以為我會同政府談判。令我英文流利咗好多，雖然照舊錯grammar同發音。」
他曾經在facebook看見一幀照片，相中他晚上在夏愨道被外媒簇擁，後方有一個口罩青年在撿垃圾，「呢場運動有好多無名者，如果冇佢哋，雨傘廣場根本運作唔到。以往社運經驗已經冇用，我都唔識set路障，市民仲勁過我」。
籲泛民要放下身段
政府一度封殺對話，之鋒呼籲市民到金鐘紮營，一夜之間滿街都是帳篷。學民思潮的帳篷區經常有佔領區不同角落的「村長」流連，近日很多人都說：「繼續留喺度，佔到有（成果）為止」。泛民更要放下身段，坐在馬路與這班沒有社運背景的佔領者開會，「以前議員同群眾交流，唔係喺屋企樓下派單張叫你投票」。
今時今日支撐佔領者的，已非催淚彈激發的怒火，「關鍵係你想香港變嗰種渴望，呢份堅定唔係激昂、煽情，而係想香港浴火重生、脫胎換骨。佢哋可能會間中返屋企一兩日，但會長期佔落去，而呢班人係清唔走」。
過去一個月，學民思潮不再集體行動，分散到各處設路障、守邊疆、在旺角前線與警對峙，「呢個時候，係咪用學民名義根本唔係重點」。
中學生更在家庭和學業壓力當中掙扎。黃之鋒在碰見一個學民義工，兩至三天才回家一次，一問之下原來他年僅13歲。數名在商場喧嘩的小五生竟然問他拿簽名，「13歲已經佔領，小五生竟然知乜叫人大釋法，過兩三年，佢哋會變成點？政府成功將爭取民主嘅年齡壓低。」
當提到佔領後可能要入獄，素來妙語連珠的之鋒一時語塞，他表示：「咁你孭得起責任就預咗……咁當然入獄嗰下，我會接受唔到，唔捨得身邊嘅人……唔好諗得咁長遠，不如諗吓場運動點打落去，我會問，政府最後會拋乜嘢接我哋招？」