佔領運動僵局在第一次談判後仍然無法打破，睇來政府強硬路線繼續佔上風，仲係諗計搞臭拖垮運動，視之為上策。林鄭會上提出所謂讓半步，事先可能通過中間人同學聯打過招呼，所以會後當學聯不接受，呼籲繼續佔領時，政府立即表示訝異。其實，學聯點會食得落。
所謂讓半步，實際上是彈弓手，主動權掌握在政府落實細節上。讓步一、向港澳辦提交報告，有乜咁大把，每個月政府都會有報告呈交港澳辦，分析政經大勢，今個月寫長啲，列出抗爭者訴求交上去，毫無難道可言。報告冇法定地位，亦唔會改變到人大常委三落閘決定。讓步二、成立各方參與平台傾2017後政制發展，又係舊時「策發會」翻版，吹水組織冇法定影響力，除非平台有北京官員落水，咁就有多少地位。但遠水救不了近火，佔領群眾不滿係2017落閘方案。三子及學聯面對當前困局都冇乜計，三子搞廣場公投（編按：現已暫時擱置），學聯則表示泛民議員辭職公投，就有退場空間，都係冇大用，廣場公投係造勢，至於變相公投就更儍。大家諗諗，為爭民主市民明知犯法上街佔領都做得出，點解忽然「降呢」去搞毫無法律約束力嘅變相公投？
拖咗三星期，溫和對話冇乜進展，但強硬路線就密密發功升溫。法庭頒禁制令後私人執法部隊出現，上次黑道味太濃衰收尾，今次低調咗，小說話多做事，拆除路障後警察配合進佔，重開交通。呢一邊廂周融又再現。其實政府知唔知今次9.28爆大鑊，同周融歪理連篇粗糙落後嘅反佔中運動有關，本來佔中三子拖太耐，個勢已經謝，點知有周融挑機，先至令佔中番生。周融復出，睇怕有人真係唔想佔領運動消失，仲想將矛盾拉高。非友即敵，將火頭燒向本地大孖沙，新華社發文砌地產大孖沙冇高調反佔中。
事實上，自2012年梁振英上台後，便有一種「決戰」心態，認為遲早要同泛民及群眾打一鑊，大亂之後便有大治，天下歸心，人人接受「和諧」社會，尊重一國，忘記兩制。亦係呢種心態令到「非友即敵」成為管治主旋律，大孖沙唔肯為梁背書，原因係梁視佢哋為政治上之敵人，其他非梁粉建制派一樣被排擠，換來一群毫無政治能量嘅自己人，你以為可靠佢哋打仗，實際佢哋靠番政府去揾食，一到今日危機關頭即刻現晒形。亦因為咁先要組織政治僱傭兵，專業外援及第二支政治工作隊伍，弔詭之處係越多激進反佔中團體、襲擊記者之暴力團，有地位之建制派就越唔敢站台，因為實在太難睇。香港內部自發溫和中間聲音消失，同政治僱傭兵橫行有關。
正如王丹所言，大家要有心理準備，學運可能會失敗，政府兩個讓步難成下台階，任何團體接受，立即會被佔領者痛罵。學運作為壓力團體，根本不適合做「政治交易」，因為交易必然會沾污運動的純潔性，而即使組成聯合陣線，加入泛民政團同政府談判，同政府達到共識機會微乎其微，因為真正對手係唔會出現在談判桌上。
看來惟有被動地睇形勢發展，而梁振英總會不斷犯上低級錯誤，為佔領運動加油打氣。
添馬男