早幾晚探完旺角鬥士，回巢剛好係利物浦主場大戰皇馬，上周利迷咁有骨氣登報驅妖，當然要睇睇支持。皇馬攻力唔使講，利迷睇住主場被不停狂攻，勢如旺角戰狼力抗藍絲榴槤乜乜乜，硬食3球都冇法，即使輸都心服，因為球賽係公正。
一場波，如你發現有「選擇性執法」，例如Ｃ朗明顯插水又即判12碼再紅牌趕人、皇馬球員明鬆踭謝拉特球證又扮睇唔到、史杜列治單刀突破射入又屈佢越位、明明皇馬球迷請足球流氓搞事又入主場數、賓施馬想拆架搬龍門球證唔理、安察洛堤話利物浦球迷阻住皇馬巴士要申請禁制令、卡斯拿斯同馬些路一齊去角球旗暗角狂踢巴神，旁證又話睇唔清等等乜乜乜。但主場球迷一舉張大型Banner，球證就即刻叫人扯落嚟，話驚飛出馬路。你話呢啲係咩比賽？而最出奇係主場球迷冇暴動，俾人打就舉手、唱生日歌，頂多偶爾有少量口角，盡量保持克制理性去撐球隊完成比賽。而睇電視直播嘅觀眾，只會睇到好亂、利物浦好暴力、球迷失控到暴動邊緣。
其實場波只要公平公正，球迷又點會辱罵對方球員同球證？面對一場完全傾斜嘅比賽，主場球迷絕對高質。至於早前狼隊林鄭對港隊U21學聯，場波冇咩進賬，對住班死守老將又可以點？不過大家最崇拜當然係球場稻草人劉華，全場冇掂波周薪照袋。
梁栢堅
填詞人+彩池人