馬圈有唔少年輕爸爸或準爸爸馬主，好似王經緯，太太懷孕，佢哋一家就頻頻贏馬，愛駒「勁綵」9月份話咁快就贏兩場；而玩具大王蔡志明公子、即甄子丹嘅老襟蔡加讚，上個月初為人父，太太汪圓圓誕下女兒，蔡加讚更親自剪臍帶㖭，真係幸福到爆。
除咗榮升爸爸，佢亦初嚐馬主滋味，首匹愛駒「車神」抵港多時，今期將首次上陣，如果成功勝出，對蔡加讚嚟講無疑喜上加喜。
睇番「車神」，係三歲愛爾蘭馬，外地賽績唔錯，六戰得兩冠兩亞，曾勝1400米三級賽，擊敗過名駒「幻想大亨」，後駒之後奪得法國大吡及愛爾蘭冠軍錦標兩項大賽，所以「車神」嘅質素肯定毋須懷疑，今場跑三班賽，計實力一定唔會輸蝕，不過要留意「車神」上季至今在港幾次試閘，名次都好後吓，晨課表現唔算太搶眼，上月亦有幾日缺課紀錄，今場亦要孭133磅頂磅，究竟蔡加讚架車撻唔撻得着，真係要跑過先知咯！