歷史真係不斷重複又重複，早年記憶卡貴，所以數碼伴侶就應運而生，不過當記憶卡價下調後，這類產品一度幾近絕跡；不過近年相片及影片Files越來越大，而且相對硬碟容量同價格都真係好平，數碼伴侶所以最近又嚟一招回馬槍！呢部CRAB可以插入SD、CF同MS三類記憶卡，而且抄錄記憶卡內資料時，仲有一個藍色屏幕顯示進度，平均速度係每10分鐘抄1GB；售價分別為齋機$599、連500GB HDD/$799、連128GB SSD/$899，據知最高可對應1TB HDD，只要開咗機背4顆螺絲就可自己更換，喜歡DIY者可以自己試吓。電源方面係好大考慮因素，店長都話部機為咗偷輕重量，所以內置電池嘅使用時間唔會太長，不過機身有USB位可直插尿袋取電，所以亦唔需要太擔心。
展昇
深水埗黃金電腦商場地面42-44號
記者：朱崇德