香港正處於大時代，曾拍過經典電視劇《大時代》、現年50歲的邵仲衡，認為今日香港的問題在於權力落在「不合資格」的人手上。早前他拍攝新晉導演黃浩然的作品《點對點》，戲中隱含對現時政府不滿的明嘲暗諷，戲中邵仲衡更爆肚諷刺警察。在大學時期修讀政治策略的他，明白今日上街作和平抗命的年輕人心態，認為「第時政策出嚟，佢哋係受嗰班」。
撰文：何永寧
電視劇《大時代》是一個反智的時代，劇中飾演丁孝蟹、將自己心愛女人李麗珍掉落街的邵仲衡，並不是香港特首梁振英口中月入14,000元不適合有投票權的一群，他在大學時期曾在「外國勢力」之一的美國修讀政治策略。
暗寸特首大話精
訪問當日佔中行動才開始不到一星期，邵仲衡為電影《點對點》宣傳接受本報訪問，他認為佔中一定要去做，學生的行為其實很容易理解：「梁振英當選嘅時候又話冇唐營、冇梁營只有香港營，又話會攞本簿落區，要做得㗎，都唔做嘅。我啲仔都會講啦『阿爸你應承畀我買呢樣嘢，你唔買嘅，買咗第二樣嘅』，何況𠵱家咁多百萬人。」
從理性分析邵仲衡覺得現今政府欠缺了一份同理心，他說：「點都好，你見到咁多人出嚟，熱辣辣都要瞓街，貼住退熱貼，噴水散熱，呢啲已經唔係political（政治）問題，係人道、kindness（同情心）嘞，你（梁振英）有冇呢樣嘢吖？」同時邵仲衡從學生角度分析不滿的情緒所在，認為若干年後他們就是要承受政策的一群：「過多幾年我哋呢班已經冇乜嘢影響，將來有乜嘢事就係𠵱家呢班哥哥仔去捱。仲有喎，我哋呢班好多人都有外國護照，衰極我哋有BNO喎。佢哋（學生）乜嘢都冇，你要了解佢哋擔心啲乜嘢喎，佢哋自己唔爭取邊個幫佢喎。」
當權者不合資格
香港有病始於權力未能有效地適當運用，邵仲衡覺得是當事人未合資格：「某程度上香港係有啲咁嘅情況，當權力放喺唔qualify（合資格）嘅人手上，就會有問題，當放喺qualify人手中，就好多問題都已經解決咗，即係會冇嘢，大家都會好開心。可能𠵱家咁多人喺出面（佔中），都係歸咎緊呢個問題，權力係咪喺qualify嘅人手上？」
自言在內地多個大城市生活過的邵仲衡，對於特首梁振英的表現，他有以下理解：「我喺上海、北京生活過一段時間，每次國家有政策出台，作為地區首長嘅都會fine-tune（微調），去配合民情。咁你話梁振英有冇（微）調，定抑或照搬，我唔知囉，不過就一定做得唔好。」
「補拍就講催淚彈」
導演黃浩然《點》片劇本已醞釀多年，又要多謝高登先替他發行。電影是借不同港鐵站的神秘點點圖，重溫港人集體回憶，導演的爺爺正是古蹟「灣仔民間生活館」前身「聯興酒莊」的經營者，故他對古物自然多一分體會。同時是佔中支持者的黃浩然，在以溫情為主的自然恬靜劇情中，加插了不少對政府不滿的內容，他說：「冇刻意加插，都係順住劇情拍，不過相信會有好多香港人有共鳴，因為真係今日大家面對緊嘅嘢。」
在戲中有一場邵仲衡以一句「走啦，唔係用胡椒噴霧噴你呀」，非常貼近近日香港所發生的事。優先場上映時不少觀眾看到拍手掌，有觀眾認為場戲是佔中發生後補拍，黃浩然笑說：「呢個係美麗嘅誤會，我哋係獨立製作，即係話我哋係冇錢嘅電影人，所以唔會有錢去補拍。不過如果真係補拍，我哋就唔會話胡椒噴霧，識用梗係講用催淚彈喇。」
【三個粉絲去首爾】
追星實錄，即上韓劇讀： http://hk.apple.appledaily.com/kstar