WTA年終賽今日進行決賽，鎖定年終第1嘅莎蓮娜喺噚日女單4強對住老友禾絲妮雅琪，打爛球拍之後先醒神，喺先失一盤下反勝晉級，衞冕最後障礙就係羅馬尼亞嘅哈蕾普。（now633及635台今日7:00pm直播決賽）
力爭連續3年稱后年終賽嘅莎蓮娜，喺上周六4強對住禾琪，一開波表現麻麻哋，第1盤完全被壓倒下輸2:6，嬲到佢喺打完第7局後，狠狠將球拍係咁砸落地洩憤。發洩完果然有效果，細威喺第2盤回勇控制大局，以6:3贏番一盤；到第3盤雙方要以決勝局分勝負，細威喺細分一度落後1:4下大反擊，最後贏細分8:6晉級決賽。細威賽後大讚禾琪表現出色：「佢喺今場波表現好好，對我嚟講係一場艱苦嘅比賽，令我一度感覺好差。禾琪係今次年終賽唯一喺分組賽全勝嘅球手，其實佢好值得贏冠軍。」另一場女單4強，哈蕾普就以直落兩盤6:2贏咗拉雲絲卡，睇吓佢可唔可以繼分組賽橫掃細威後再贏一次喇。
女雙方面，衞冕嘅兩岸組合彭帥/謝淑薇亦都順利打入決賽，喺上周六輕鬆以盤數2:0擊敗古迪耶絲娃/洛迪安洛娃組合，今日會爭冠軍。
識睇，一定係睇足英台【英波Live】：
http://soccer.appledaily.com
http://bit.ly/engballlive