【記者林俊謙報道】和平佔中與學聯在佔領行動初期緊密合作，但近日有關應否討論退場、廣場投票等問題，據知已由學聯主導。和平佔中發起人陳健民透露，約三星期前、即大學校長呼籲學生撤離時，曾與學聯討論是否撤退，坦言最終何時才會撤離，現在要由學生決定，現時只透過另一佔中發起人戴耀廷與學生溝通，強調會支持學生決定，「佢哋做，我哋就會支持」。
辭職公投應先與政黨商討
陳健民昨日接受本報查詢今日廣場投票詳情時，叫記者要向學生查詢，「要等學生自己去講，基本上係學生啲嘢，我哋（和平佔中）只係提供技術支援」。陳指目前只透過戴耀廷與學生溝通。對於學聯日前提出立會議員辭職進行變相公投，陳坦言亦只屬初步概念，具體做法與和平佔中「根本未傾過」，「邊個議員會辭？呢啲嘢要政黨決定，學生其實唔應該咁快出來講，應該同政黨傾吓先，要政黨肯做先至得」。
對於有人指今次廣場投票其實是「退場機制」，陳強調投票與退場無關。至於何時才會退場，陳健民坦言現時由學生決定，「呢個要問學生，對我哋佔中來講，我哋兩三個星期前，已經同佢哋討論過。當校長叫佢哋走時，我哋都討論過係咪要撤離，對我哋佔中來講係無問題的，幾時離場我哋都支持佢，離場的決定喺學生嗰度，真係嘅，佢哋做，我哋就會支持」。
陳健民又說，和平佔中仍希望每日有定期與學生會面，但並不容易，「我哋都盡量每日捉佢哋返嚟（金鐘）一次開會，做到咪做囉，做唔到咪做唔到囉，現時係咁嘅狀態，所以我叫你要問學生，最好問佢哋」，坦言自己難以代替學生回應公投問題，「個運動佢哋帶領的，但成日要我哋幫佢答嘢，我答唔到，所以由佢哋答會好啲，會公平啲」。
對於近日網上流傳16名和平佔中義工集體「辭職」，陳健民就指是假消息，「根本無呢啲事」，解釋只是部份佔中職員因為佔領行動長時間進行，部份要暫時離開恢復上班和上課。