朋友甲最近發表偉論，話若果你唔想無咗啲朋友，就最好講少幾句，因為「寧願一生都不說話都不想講假說話欺騙你」，何況好多時傾傾吓就變咗做拗，拗拗吓10年朋友可能1秒unfriend。朋友乙亦鍾意食人口水尾，近排成日話：「我可能唔同意你嘅睇法，但誓死捍衛你說話嘅自由」，但講似乎易過做好多！朋友丙就越嚟越中立，因為佢成日口出狂言之前，都識得先問吓自己係咪人哋心裏面條蟲，結果係講少好多無謂嘢，因為佢發現朋友之中根本冇幾多個有生蟲。
我發現聽咗朋友甲乙丙嘅意見之後，生活平靜但悶咗好多，好在有費Sir（黑衫），好在佢退而不休，最近為自己本自傳出修訂版而繼續發聲，唔講好哋哋，佢一講就撩起我心裏面團火！提醒咗我想要咩嘢！
好多人都想知究竟費Sir點睇親自欽點嘅莫耶斯遭遇不幸，估唔到佢真係一句好說話都冇，一嚟就話莫耶斯唔肯聽佢忠告留番啲舊人，一下子換晒自己友，結果搞到個個唔適應。二來，莫耶斯執隊曼聯越踢越慢，冇晒以前佢幾十年嚟為快則破嘅殺着！聽落莫耶斯最後極速被郁完全係自取其咎，咁梗係唔關佢老人家事，但馬後炮先講同我哋一般凡夫俗子有乜分別。然後佢又要做番好人話曼聯管理層決定要炒莫耶斯嘅時候冇問過佢，佢都係睇報紙先知咁大件事。
對親信，費Sir無乜情義；對仇口佢亦放唔低。講到雲格，費Sir話戥佢上年攞到足總盃好開心，因為佢已經太耐冇攞冠軍，不過佢又話雲格應該做唔到多幾年，因為今時今日嘅競爭唔容易。嘩，句句有骨嘅？老人家70有2，見盡風浪，唔係應該可以放開胸懷多啲咩！畀多啲鼓勵同空間後輩得唔得呢？
咁都唔係冇friend嘅費Sir，以前曼聯次次贏咗波之後，費Sir都會請飲番杯嘅肥Sam，自從去咗韋斯咸之後，呢幾年槌仔球迷彈多過讚，費Sir就忍唔住幫老友開口，話啲fans成日話肥Sam教得唔夠好睇不切實際，又話佢自己咁多年嚟對住韋斯咸都未曾驚過，一係就打得好屎一係就有狗屎運。哈哈，意思係呢隊波不嬲屎波。咁為人為到底，費Sir仲交出咗一個賭命嘅問題，佢話好希望有人能夠喺佢死之前，解釋佢聽乜嘢係槌仔球迷成日話要有嘅West Ham way！喺佢眼中，槌仔呢啲蟻民球隊能夠生存護到級就算啦，餓你唔死你仲想要好有型咁生活，仲話要乜way物way簡直係唔知足都極，好明顯係未捱過啦你班低積分人士！
為咗唔畀費Sir睇死，我諗緊有咩way可以盡快脫貧，結果發現與其等奇蹟發生喺韋斯咸身上，倒不如轉軚支持曼聯，到時生活即刻過得好啲，朋友都多啲！
KEYMAN
節目主持