十月二十日，左丁山參加香港「亞洲商貿論壇」，坐在印尼經濟領事旁邊，呢位女士一邊聽，一邊抄notes，跟住又睇黑莓手機，佢對左丁山講，當日就係印尼新總統維多多Joko Widodo宣誓就職之日，佢要及時知道首都耶加達發生乜嘢事。
好彩一切平安，維多多順利就職，上任總統尤多諾做足最長任期十年之後，在總統官邸與維多多交接，成為印尼史上普選總統移交政權俾普選總統嘅第一次，係印尼一個歷史時刻。印尼嘅人口之中（2010年普查有二億三千七百六十萬人），有58%人口住在爪哇島，上一個十年度，每年人口增長1.49%，估計到咗2043年，人口會超過美國，只係在印度與中國之後，到時中印印三國嘅總人口會高達30億或以上，諗吓都得人驚，從壞方面睇，土地資源糧食、環境都要承受巨大壓力，從好嘅方面睇，三國市場龐大無比，歐美瞠乎其後。
但最重要嘅，在人口咁多嘅國家，政治是否清明，國家財政是否管理得好，社會、官僚貪污是否可以消除，否則嘅話，社會亂糟糟，人口多反而會釀成世界危機。三國之中，中國堅持共產黨專政，冇民主，印度印尼就走進了西方政治思維體系，用人民選票選出替代政府。梁振英在英國讀書，只學西方測量技術，不學西方政治思想，到依家還以為真正普選就會選出窮人嘅政府，逼政府推行福利政策。最近有兩個有趣例子：印尼民選總統維多多上台後構思大力削減燃料津貼（等於提升燃料價格50%），將慳番嘅錢用嚟興辦教育、搞基建及醫療保健。印尼人過往每逢政府話加油價，就會暴動，故此削減燃料津貼係政府禁忌，但維多多深知津貼燃料價係政府一大負擔，令政府無力推動其他更逼切，長期對國家更有利嘅發展項目，故此決定一上台就將自己民望押注，對抗民粹，幾有魄力與擔當。另外，泰國軍人政府上台後，大權在握，國會全部由商界、軍政界分餅仔，絕不民主，但總理巴育將軍竟然推出（或翻炒）他信嘅惠農政策，向農民派錢，令反對他信嘅曼谷精英大為不滿。點解民選總統要反民粹，槍桿子政府就反其道而行之，逢迎民粹？其中原因當然係泰國軍人政府冇認受性，心急要買怕民粹，而民選總統就因為有民眾授權，咪夠膽搞改革囉！